Անբավարար քունը ստիպում է մեզ հոգնած զգալ նույնիսկ անմիջապես արթնանալուց հետո: Բացի այդ՝ անբավարար քունը քաշի ավելացման գլխավոր պատճառներից մեկն է: Ահա, թե որոնք են բնականոն քունը խաթարող երևույթները և ինչպես պետք է պայքարել անքնության դեմ:
1. Օդի ոչ ճիշտ ջերմաստիճան
Առողջ քնի համար ամենահարմար ջերմաստիճանը 15-23 աստիճանն է: Քնելիս վերցրեք թեթև ծածկոց, իսկ գիշերը այն փոխարինեք ավելի հաստ ծածկոցով:
2. Ֆիզիկական ծանրաբեռնվածություն
Ֆիզիկական վարժությունները գրգռում են նյարդային համակարգը. սպորտով զբաղվեք քնելուց ամենաքիչը 3 ժամ առաջ:
3. Ռեժիմի բացակայություն
Հանգստի և ուժերը վերականգնելու համար օրգանիզմին որոշակի ժամաքանակ է պետք: Պետք է աշխատել քնել նույն ժամին, ցանկալի է ժամը 22:00-01:00-ի հատվածում:
4. Լուսավորություն
Նույնիսկ լույսի թեթև շողը վնասում է առողջ քնին: Անջատեք բոլոր լույսերը կամ էլ քնի համար դիմակ հագեք:
5. Աղմուկ
Նույնիսկ աննշան աղմուկը խանգարում է օրգանիզմին՝ ամբողջովին վերականգնել ուժերը: Օգտագործեք ականջախցաններ:
6. Մահճակալի ոչ տեղին օգտագործումը
Շատերը մահճակալն օգտագործում են ոչ թե որպես քնելու հարմարանք, այլ աշխատանքային սեղան, ինչն, իհարկե, անթույլատրելի է: Աշխատանքը կատարեք ննջասենյակից դուրս:
7. Կոֆեին
Կոֆեինը, որն առկա է ոչ միայն սուրճի, այլև թեյի և շոկոլադի մեջ, նույնպես խանգարում է առողջ քնին: Օրվա երկրորդ կեսին նվազեցրեք կոֆեին պարունակող մթերքների օգտագործումը:
8. Քնելու փորձեր
Շատերը պառկում են քնելու այն ժամանակ, երբ քունը չի տանում: Եթե դուք 20 րոպե շարունակ չեք կարողանում քնել, վեր կացեք և սկսեք գիրք կարդալ կամ նմանատիպ որևէ բանով զբաղվել:
9. Ալկոհոլ
Ճիշտ է, ալկոհոլը թմրեցնող ազդեցություն ունի, սակայն խանգարում է արագ և հանգիստ քնելուն: Ալկոհոլ կարող եք օգտագործել միայն քնելուց 2 ժամ առաջ, իսկ ավելի լավ է՝ ընդհանրապես չօգտագործել:
10. «Գերբեռնված» գլխուղեղ
Հաճախ վատ քնի պատճառն այն է, որ մենք թույլ չենք տալիս մեր ուղեղին բեռնաթափվել՝ ծանրաբեռնելով այն օրվա տպավորություններով, այլևայլ մտքերով: Պետք է հեռացնել բոլոր անհանգստացնող մտքերը և ուղեղը զբաղեցնել թեթև բաներով, օրինակ՝ կարելի է հաշվել:
11. Սովորույթի բացակայություն
Քնելուց առաջ հանգստացնող սովորություններ ձեռք բերեք, օրինակ՝ գոլ ջրով լոգանք ընդունելը:
